Zelduna þarf vart að kynna en lengi má við bæta. Veidin.is barst til eyrna að höfundur hennar Kjartan Antonsson væri sífellt að þróa og prófa ný afbrigði og þá sérstaklega fyrir jökulár og vatnsmiklar ár.
Já það er rétt en svosem ekkert nýtt. Ég hef verið að hnýta stórar Zeldur alveg upp í stærð #6 sem hafa gefist mjög vel í lituðu vatni og þegar árnar eru bakkafullar eftir miklar rigningar.
Sem dæmi veiði ég stundum á Gíslastöðum þar sem er jökulvatn og þar hef ég tekið alla mína laxa á Zeldur númer.6 án undantekninga og eru þeir orðnir nokkrir. Gíslastaðir hafa í áratugi verið nánast eingöngu spúnasvæði og þegar ég var að fara þangað í fyrsta skipti var mér sagt að gleyma flugunni.
Ég var ekki alveg á því og þá datt mér í hug að prófa nýjar útfærslur af Zeldu og hafa þær stórar. Bæði með væng en líka hnýttar hefðbundið og hafa báðar útfærslur gefið mér vel. Sem dæmi fórum við hjónin þangað í fyrra með góðum vinahjónum. Ég var sá eini sem notaði fluguna eingöngu, Zeldu að sjálfsögðu og landaði ég 3.löxum á meðan Gréta fékk engan á spúnin og ekki heldur vinur okkar.
Eitt skiptið vildi ég að vinur okkar færi á undan mér með spúninn og hann spúnaði mjög vel yfir svæðið. Ég var rétt á eftir honum með Zelduna. Við vorum að spjalla saman í rólegheitum þegar hann tók Zelduna og vorum við vissir um að þessi var búin að sjá spúninn.
Hefðubundið veiði ég Zelduna mest á steindauðu reki. Í gegnum árin hefur hún gefið best þannig og þá lengi ég um 1.fet við hvert kast þar til ég er búin að skanna hylin. En þessar stóru hef ég verið að strippa rólega í jökulvatninu, bara rétt úlnliðin til að hreyfa hana aðeins.
Einnig hefur þessi stóra gefið mjög vel í birting á haustin hjá þeim fáu sem hafa prófað. Það er hennar aðalsmerki að bæði lax og sjóbirtingur virðast gína við henni. En það má reyndar bæta því við að Zeldan hefur einnig marga urriða og bleikjur á samviskunni.
Hægt er að sjá nokkur video inn á facebook síðunni zeldan þar sem nokkrum löxum er landað á Zeldu #6
